Tsiab Peb Caug Hmoob, ntawm peb haiv neeg Hmoob lub Tsiab Peb Caug yog ib lub uas tseem ceeb heev nyob rau ntawm peb haiv neeg. Ib xyoos puag ncig los txog lub kaum ob hlis tag rau hnub 30 ntawd, peb haiv neeg Hmoob mus nkaum taw qaib yav yuav tsaus ntuj, tag kis yog hnub xiab ib rau xyoos tshiab thiab hnub tshiab rau peb haiv neeg Hmoob.

 

Haiv neeg Hmoob lub tsiab peb caug ntawm tham nov, nws yog ib lub tseem ceeb thiab muaj kab li kev cai nyob rau ntawm peb haiv neeg Hmoob xws li, nkaum taw qaib, hu plig, hu dab poj yawm, niam txiv, yus phaj, thiab xeeb luj xeeb ntxwv, uas yog cov tau tag sim neej thiab tso plig tag lawm, yuav tau hu cov ntawm no los nrog noj nrog haus quas lub niaj lub xyoo, kev tsis zoo kom tag nrog lub xyoo laus mus kom peb haiv neeg Hmoob nyob ntshiab dej huv txhuv, tsis ntsib mob ntsib nkeeg, hmab tsis daum tes hlua tsis daum taw, dej tshiab kom tau haus, qav tshiab kom tau noj.

 

Kaj ntug tas kis hnub xiab ib ntawd, thaum qaib qua thawj tsig, ib tsoom niam txiv kwvtij neej tsav sawv los cuab qaib, cuab npua, cuab nyuj, cuab nees, cuab tsiaj cuab txhuv, thiab hu plig qoob plig loo plig nyiaj plig kub plig tsiaj plig txhuv kom los tsev. Tsis tag li no xwb, yuav mus ce dej tshiab coj los luj nrog rau cov dej qub, saib dej tshiab hnyav dua dej qub los, dej qub yuav hnyav dua dej tshiab = tau tias saib xyoo tshiab no yuav muaj txiab xeeb khaub thuas dua los xyoo tas los lawm no muaj sab foob khaub thuas dua.

 

Yog dej tshiab hnyav dua, yuav muaj sab foob khaub thuas dua.

Yog dej qub hnyav dua no ces xyoo tshiab no yuav tsis muaj sab foob khaub thuas li xyoo tag los no lawm.

 

Thaum hu tej plig tsiaj plig txhuv tag lawm, ces yuav tau los tsa tus txhiaj meej pem xeeb sawv rov los kav lub qhov rooj tag, ib xyoo kaum ob lub hlis tag xyoo laus xaus, xyoo tshiab tawm tuaj, tsa tug txhiaj meej sawv los kav lub rooj tag, los pov niam pov txiv, pov metub menyuam, pov nyiaj, pov txiaj, pov tsiaj, pov txhuv, pov qoob, pov loo. Tsa ib tsoom ncej dab ncej qhuas sawv rov los zov vaj zov tsev, ua qoob ua loo, khwv nyiaj khwv txiaj, tu tub tu kiv, tu tsiaj tu txhuv kom zoo li lub siab xav; ua me kom tau ntau, ua ntau kom noj tsis tag, tu tsiaj tu txhuv kom nroo ntws li nraj yig lauv tsaw, npua kom nroo ntws li npua teb, nyuaj kom nroo ntws li nyuaj qus.

 

Hnub xib ib ntawm Hmoob lub tshaib peb caug nov, caiv tsis ua lag luam, tsis siv nyiaj tawm, tsis taws riam, kov txuas, kov taus li. Nyob sib tham, mus ntaus tuj lub, mus rag txuj rag ci txais tos lub xyoo tshiab. Metub mentxhais yuav hnav khaub ncaws tshiab (ua Zam) mus txais tos lub xyoo tshiab rau hnub xiab ib ntawd. Peb Haiv Hmoob yuav tuaj mus koom kev tsa Hauv Toj rau hnub xiab ib. Muaj kev lom zem xauv npo, rau hnub xiab ib nyob rau txhua Hmoob lub zos.

 

Hnub xiab ob ntawd, peb ib tsoom tub ntxhais hluas yuav tuaj koom kev lom zem, pov pob hais (khawv, kwv) txhiaj thiab nrhiav tus hlub rau hnub xiab ob, peb, plaub, tsib, rau, thiab hnub kawg. Peb Haiv Hmoob yeej ib txwm dhia qaib xya hnub thiaj li txaus rau ib tsoom tub ntxhais hluas tuaj mus xaiv nyab thiab xaiv vauv. Tsiab Peb Caug, kuv tseem nco ntsoov tsis nploj mus vim yog muaj kev loj zem, rag txuj rag ci, Hmoob tej laus tsa hauv toj rau ib Tsoom Hmoob sawv rov los ua tus Coj thiaj tau nrog ib tsoom niam mab niam suav haiv neej tau noj. Peb Hmoob Txuj Ci Siab, yog peb tsis sib pab tig rov los khaws, yuav poob tej txuj ci tag mus tsis muaj tug paub. Peb yuav tau mus nrhiav peb tej txuj nyob rau niam mab niam suav tsev paub zwm txuj muaj nyob toob qab ntuj.

 

Peb yuav thov peb Haiv Hmoob sib pab khaws peb li txuj kom txhob poob saib peb puas yuav mauj nyob muaj koob.